Tuesday, 22 February 2011

Brown Bag Quilt Challenge Inskrywing

Die foto's is op, en julle kan gaan ooohhh en aaahhh na die inskrywings. Bly op hoogte! Die kompetisie eindig 1 April, dus gaan die inskrywings nou begin instroom.

Hier is my projek - Whirlpool:

Ek het begin met hierdie materiale, gestuur deur Brenda van Quilting Along Life's Way . Die blou materiaal was die kleinste stuk, en die groen was die grootste. Ek het so gewerk dat ek die blou en rooi met sterre eerste opgebruik het. Daarna het ek die rooi-en-goud, en die groen verwerk.


Ek het besluit om 'n table runner te maak. Ek het nie soorgelyke of gepaste materiale in my stash gehad nie. Dus moes ek werk met wat ek het. Die reëls het gespesifiseer dat ons net een stuk nuwe materiaal mag aankoop, maar van enige lengte. Die materiaal wat ek by gekoop het, is die blou met die wit kolle, en slegs 1/2m daarvan.



Die top bestaan uit:
15 vierkante (middelstuk en buitekant)
24 kort stroke vir die middelstuk
28 lang stroke vir die buitekant
224 HST's (Half Square Triangles) verwerk na 112 vierkante vir die middelstuk.
Die kleinste vierkant se voltooide grootte is 3.8 cm / 1.5 inch
Die kleinste Half Square Triangle se voltooide hoogte is 2.8 cm / 1 inch

Beplanning het my omtrent 2 weke geneem. Die stikwerk, kwiltwerk en snywerk het...baie lank geneem.
 
Hier is 'n die middelstuk van nader bekyk. Die middelstuk is my eie ontwerp, terwyl die table runner-patroon van 'n bestaande patroon geneem is. Ek moes dit egter aanpas by die grootte van die middelstuk.


Die agterkant bestaan uit die oorblywende groen, rooi-en-goud en blou met kolle materiale, asook materiaal van my stash. Dus het ek al die materiale gebruik wat aan my gestuur is, asook van my stash gebruik. 


Finale grootte is 163cm / 64 inch by 82.5 cm / 32.5 inch. Kwiltwerk is gedoen deur middel van Free Motion Quilting tegnieke.

Gaan kyk op Flickr vir die ander inskrywings.

Sterkte aan al die deelnemers!

Sunday, 20 February 2011

Absoluut Niks!

Dis wat ek die laaste maand gedoen het, sedert my laaste inskrywing.

Ons was bietjie weg met vakansie, en het Maandag die 14de weer begin werk. Intussen het ek skaars tyd gehad om 'n naald en gare op te tel. Maar hopelik sal dit binne die volgende paar dae reggestel word :)

Ons het natuurlik in SA gaan kuier vir ons vakansie. Tyd was (baie) te kort, maar ek kon darem 'n oomblik of twee in 'n kwiltwerk winkel spandeer. Ongelukkig was my tyd beperk, dus het ek net die nodige goed aangekoop (liniaal, penne, materiaal vir huidige projekte, ens.). Ek was soet gewees en het geen materiaal aangekoop om te stash nie.

Ons was ook onder andere net buitekant Humansdorp. Daar het ek die voorreg gehad om 'n foto te neem van Suid Afrika se nasionale voël: die Bloukraanvoël.



Soms glo ek vas dat my (skielik) liefde vir naaldwerk van my Ouma afkomstig is, aangesien sy baie met 'n naald en gare kan vermag. Tog, soms wonder ek of my kreatiwiteit nie dalk van my Ma afkomstig is nie. Tydens 'n sosiale geleentheid, het sy - spesiaal vir Manlief - hierdie oulike pynappel gebring:




Dit bestaan uit die heel pynappel, chillies en butternut (in skywe gesny). Tog te oulik, of hoe?

Al ooit gewonder hoe Mauritians huise bou? Dit was vir my verstommend om te sien hoe die geboue hier opgerig word. Die geboue word gegiet. Die hele bou proses is nog vir my bietjie duister, maar wat ek wel weet, is dat hierdie masjien die grootste deel van die bouwerk uitmaak:


Hierdie is 'n slurp, wat die sement pomp en deponeer waar jy dit nodig het. Indien ek reg verstaan is die bakstene ook hol binne-kant, sodat hulle die sement ook daarin kan plaas en sodoende die mure baie stewig maak.  Op hierdie spesifieke dag het hulle die vloer van 'n tweede verdieping gelê.




Kan julle sien hoe hulle die slurp rond beweeg en die sement plaas waar hulle dit benodig. Die tweede werker maak die sement glad en versprei dit eweredig. Baie slim!

Wel, dis dit vir eers!

Monday, 24 January 2011

Naaldwerk naweek

O, wat 'n lieflike naweek het ek beleef! Manlief het tyd met sy rekenaar spandeer, en ek het tyd spandeer agter die sny tafel en naaldwerkmasjien. Ek het so baie mikpunte bereik, dat ek besluit het om myself te bederf.

Ek het my Brown Bag Quilt voltooi. Daar is nou net die klein "tweaking" wat gedoen moet word. Ek wys vir julle die rugkant, vir eers. Die groen, donkerblou en rooi is al wat oorgebly het van die materiaal wat oorspronklik aan my gestuur is, en die bietjie wat ek moes by koop. Die blou met die prentjies op, pienk en wit is uit my "stash". Dus het ek al die moontlike bruikbare materiale gebruik vir hierdie kompetisie, asook 'n bietjie "stash busting" gedoen. Dis 'n wen-wen situasie vir my!



Daarna het ek aan die Raggedy Blokke 7 tot 9 gewerk, wat Donderdag vrygestel is. Hulle is almal vasgewerk, maar moet nog geborduur word. Blok 6 wag ook nog om geborduur te word. Ek het nog nie lank genoeg tyd gehad om te sit en borduurwerk te doen nie. Blyk my ek begin agter raak!

 
Na ek alles voltooi het, het ek besluit dis tyd om vir my 'n nuwe sak te maak. Hier is my ou sak:


Hierdie was die heel eerste kwiltwerk projek wat ek gedoen het. Ek het 'n klas bygewoon, waar ons hierdie sak gemaak het. Hierdie sak bestaan uit 8 kleure. Die patroon is so dat jy enige iets van 2 kleure tot 72 kleure kan gebruik. Maar ek dink tog dat 2, 4 en 8 kleure vertoon die beste.

My ou sak is al twee jaar lank in diens, en dit begin te wys:


Die handvatsels is al onherstelbaar;


 en die buitekant het begin los skeur (al het ek dit voorheen herstel), en die kleure het begin verbleik a.g.v. die son.

Wat my betref, was dit tyd vir 'n nuwe een:

 
Ek het hierdie keer besluit om iets meer neutraal te maak. Ek het twee materiale gebruik. Die gekleurde materiaal het bruin, groen, goud en blou in. Dus is dit 'n two-tone/multi kleur skema. Ek neem my sak orals saam, selfs na kliënte toe. Dus moet ek altyd op my beste lyk. Ek glo hierdie sak pas in daardie "profiel".

Wel, dis my naweek. Hoe was jul naweek?

Groete vir eers!

Saturday, 22 January 2011

Kookboek wenners

En die wenners is:


(Drum roll)



en 


Baie geluk! Ek sal jul eposse binne-kort aanstuur.

Aan die wat ongelukkig nie gewen het nie, daar is altyd volgende keer. Asook, indien jul belangstel om die boeke te koop, gaan na www.quiltinggallery.com/quilters-cookbook/ en maak jul aankope daar.

Tot volgende keer!

Thursday, 13 January 2011

Grand Baie, Kussings en Tornado

Ons het verlede week 'n paar dae "vakansie" gehad. Ons is Vrydagoggend deur na Grand Baie vir 'n vinnige "inloer". Daar aangekom, is ek na my gunstelling winkel: Delsol.


Hierdie winkel se oorsprong is van VSA, en het 'n tak hier geopen. Die eienaars bly al 10 jaar hier in Mauritius, en het iets "nuuts" gesoek om te probeer.


Wanneer jy die winkel ingaan, is daar net souvenirs waar jy kyk. T-hemde, sleutelringe, juwele, broeke, sakke, en nog meer. Wat maak hierdie produkte so spesiaal? Die produkte verander van kleur wanneer dit in sonlig/UV in aanraking kom. Selfs die sakkies waarin jou aankope gedra word verander van kleur:


Sonder son:


 In sonlig:


Nadat ek my beursie leeg gekoop het, is ek uit na die strate. Dit was rondom middag-ete, so baie mense was oppad om iets te kry om te eet. Die grootste gedeelte van die hoofstraat (in die midde-dorp) is gepak met winkels en restaurante vir toeriste en die mense wat daar bly.


Hier staan 'n Majestic Palm tussen 'n klomp winkels.


Na nog 'n paar besoeke aan 'n klomp winkels, was dit tyd om huis toe te gaan.

Alhoewel Grand Baie baie sonnig en warm was, was Flic en Flac en Tamarin baie donker, maar steeds warm en bedompig.


Ons het die laaste paar dae baie reën in die area gehad, en is baie dankbaar daarvoor. Die Tamarin berg was baie vaal en bruin, maar nou is dit gras groen. Mense sê die reën is baie laat hierdie jaar (verlede jaar het dit in November al begin reën), en as gevolg daarvan het sommige dele van die eiland gebuk gegaan onder water beperkings. Hoop hierdie reën val op die regte plekke, sodat die damme kan vol en water na al die belangrike plekke toe kan gaan.

Tydens die "donker" dag in Tamarin, het dit heerlik gereën oor die see. Maar ek het nooit gedink dat ek hierdie prentjie sal sien naby aan die eiland Mauritius nie...


Ongelukkig is die prentjie baie swak. Die fokus kon net so ver gaan, voordat die reën die prent heeltemal verdof het. Ons skat die tornado (of twee) was minstens 8 Km uit oor die see, maar ons kan dit nie met akkuraatheid sê nie. Ongelukkig kon ons ook nie sien of die tweede "funnel" sy "touch down" bereik het nie, want daar het 'n wolk oor die gebeurtenis beweeg.

Na al hierdie opwinding, was dit tyd om rustig te raak. Ek het agter die naaldwerkmasjien ingeskuif, en die derde Marble kussing voltooi:


3 van die 12 kussings in nou voltooi :-D Nog 9 om te gaan... Ek het ook die Raggedy Blok 6 vasgewerk, en moet nog net borduur word. Sal julle wys sodra ek daarmee klaar is.

Sjoe, wat 'n lywige blogpost! Wel, ek skuld julle seker foto's en stories oor Mauritius. Het nogal lanklaas iets oor die eiland geskryf.

Onthou van my weg gee die 22ste. Lees my vorige inskrywing vir meer detail.

Tot later!