Friday, 17 December 2010

Kersfeeskoek en Borduurwerk

Ek moet erken dat die laaste paar dae sukkel ek om my aandag op een taak te hou. Ek spring rond tussen werk, huis en Kersfees voorbereiding, en dit lyk nie of ek veel vordering maak met enige iets nie. Voel julle ook so?

Die take wat ek wel voltooi het, tot dusver, is Vrugtekoek bak en 'n bietjie borduurwerk.


Ek moet nou bieg en ook noem dat ek nie kans sien om die koek te versier met harde-versiersel nie. Dit het net na te veel werk geklink. Buitendien, hierdie koek het net 60ml sjerrie in, waar die ryk vrugtekoeke gewoonlik begin met 100ml, en dan elke week nog 'n bietjie sjerrie by kry om dit klam te hou. Dus glo ek nie dis nodig vir die versiering nie. En die prentjie in die kookboek, het ook geen versiering gehad nie (vir wat dit werd is)! Manlief noem gereeld dat die huis ruik nou na 'n drank winkel/kroeg, met die geur van vrugtekoek in die huis...Wonder of hy skimp vir 'n stukkie koek :-)

My kussing #3 se borduurwerk is nou voltooi. Nou moet ek die "toebroodjie" maak en dit kwilt. Vandaar maak ek die agterkant en dan is dit klaar. Sal kyk of ek lank genoeg kan stil sit om dit te doen. 


Hier is 'n paar naby skote van die borduurwerk:




Ek kry gereeld vrae oor watter "Block of the Month" of projek ek vanaf werk. Hierdie is egter nie 'n Sew Along projek nie. Ek het vroeg in die jaar 'n boek oor appliek gesoek, en het hierdie boek gekoop:


Al die kussing oortreksels wat ek tot dusver gemaak het, sien hier en hier, en ook nou die derde oortreksel, kom uit hierdie boek uit. Daar is in totaal 13 projekte. 12 van hulle kan as kussing oortreksels gemaak word, en die 13de projek is 'n muurbehangsel. Dis 'n uitstekende boek, en elke stap en borduur steek word deeglik bespreek. Die boek is baie duidelik, en gebruikersvriendelik. Alhoewel daar baie riglyne in die boek is, word die spasie vir jou gegee om 'n bietjie van jou eie "touch" in die projekte in te werk. Vir mense wat belangstel in appliek, kan ek hierdie boek voor aanbeveel. Daar is egter baie appliek tegnieke, en hierdie boek behandel slegs een van hulle, maar jy kry baie vinnig die idee van hoe alles werk. Ek het die boek by Craft Connection gekoop

Geniet julle voorbereiding vir Kersfees, en geniet die feesseisoen.

Tot later

Wednesday, 8 December 2010

Fat Quarter Pack weggee

Hi Almal

Jackie by Canton Village Quilt Works bied 'n weggee aan. Jy staan 'n kans om een van twee fat quarter packs te wen.

Die kompetisie is geldig tot 12de Desember.

Sterkte!

Wednesday, 1 December 2010

Raggedy en Marbles

Wel, nadat ek my Kersfees kwilt klaargemaak het, is ek uitgeput. Ek het ek my masjien geolie en skoongemaak, en dit gebêre. Tog het ek wel aan die volgende twee projekte gewerk:

Raggedy #5 is voltooi.


Sjoe, ek kan nie glo ons is al amper half-pad met die projek nie! 5 uit 12 blokke is al klaar. Ek kan nie wag om hierdie kombersie klaar te maak nie. Ek sien alreeds hoe ek onder hierdie kombers sit, en tv kyk of boek lees, hierdie winter... Om die groter prentjie te kry van hoe die kwilt op die oomblik lyk, het ek al 5 blokke uitgepak op die grond...


Is dit net ek, of sien julle ook 'n lekker beker Cappuccino met sjokolade sprinkels...:-D

Verder het ek aan die volgende Marble kussing begin werk. Die appliek stukkie is uitgesny en vas gestryk. Ek het al begin met die borduurwerk rondom die middelste blom, en die stele van die omringende blomme. Moet nog net een steeltjie vaswerk.


Die boonste laag materiaal is organza. Dit work gebruik om die kleure van die appliekwerk te verdof, en daarom word dit skadu-werk genoem. Jy plaas jou appliek bo-op die agtergrond, en plaas dan die organza bo-oor. Die borduurwerk gaan deur al drie lae materiaal. Wanneer dit klaar is, dan kom die maklike en vinnige deel: kwiltwerk en die maak van die agterkant van die oortreksel.

Verder, moet ek met skaamte erken, het ek nie veel gedoen nie. Ek dink die "holiday mood" het nou die beter deel van my gekry.

Tot later!

Thursday, 18 November 2010

Christmas Quilt Show 2010

Wie van julle is lus om bietjie rond te loop...in hierdie geval seker rond browse... en vele kwiltwerke te bekyk? Miskien opsoek na bietjie inspirasie vir Kersfees? Sew Cal Gal bied 'n Kersfees kwilt skou aan, en ek het besluit (na die aanbeveling van Millie) om ook my indiening te maak.

Hier is my inskrywing:


Hierdie kwilt het ek 'n paar dae gelede voltooi, en is my eerste muurbehangsel wat ek gemaak het.  Hierdie muurbehangsel word gekomplimenteer met hierdie sterre, wat ek 'n paar maande gelede voltooi het:




Daar is vele inskrywings vir die skou, en julle kan elkeen (virtueel) bekyk. Kliek op die prentjie, op my linkerkantste paneel, en word weggevoer...

Geniet dit!

Monday, 8 November 2010

Kerskwilt - KLAAR!!!

Dit is klaar, dit is klaar, tra la la la-la...!!!

Hier is my Kersfees kwilt tra la la la-la:
Dis seker nie so noemenswaardig nie, maar ek is baie trots op die werk wat ek op hierdie kwilt gedoen het. Siende dat ek skaars 'n rukkie terug ontdek het hoe om FMQ te doen op my masjien, dink ek die werk wat gedoen is, is baie goed. Ek het baie tyd gehad, siende dat ons nou 'n paar vakansie dae gehad het, en dat manlief vir 'n rukkie weg was met 'n besigheids-projek. So, ek het agter die masjien gaan sit, baie mooi met hom gepraat, en die volgende het uit die naald en gare verskyn tot op die kwilt:

Tussen die kleiner prentjies, het ek drie verskillende prentjies, in rooi, gekwilt. Die eerste een is die ster...


...tweedens is die Poinsettia...


 ...en derdens 'n stel klokkies (dink hulle is die moeilikste om raak te sien).


Rondom die middelstuk, het ek 'n kruiper met blare (probeer) kwilt, in groen...dink ek moet nog oefen aan die punte van die blare...dit lyk 'n bietjie rond :-)


(soos met al die ander, indien julle op die prentjies kliek, word die prentjie groter)

Dit voel vir my asof ek 'n berg uitgeklim het - ek het nie seer bene of longe sonder asem nie, maar die oorwinning van die klim! Wonder wat ek volgende kan kwilt...

Ek het tussen-in ook aan blok #4 van die Raggedy BOM gewerk.

Tot dusver, was hierdie my gunstelling een om te borduur.

My "Brown Bag" kwilt staan op die oomblik stil. Ek het nie genoeg blou nie, en moes dit aankoop...grrrr...Ek het so gehoop dat ek al die materiale kon gebruik, sonder om ekstra aan te koop, maar die "goeie fee" was nie aan my kant nie. Hopelik sal ek my pakkie blou materiaal binne die volgende twee weke of so kry.

Ek dink my masjien het so bietjie van 'n time-out verdien. Ek het 'n paar hand-werk projekte wat ek kan doen. Dink ook ek gaan dinge nou bietjie stadiger vat, maar nie heeltemal dood stop met my projekte nie. Net tot na Kersfees en Nuwe jaar, dan tel ek weer spoed op.

Tot volgende keer.

Ps. For those of you who do not understand Afrikaans, may I teach you something... The word "Kwilt" means "Quilt", and is pronounced the same. The Translator understands and translate the word "kwiltwerk" to "quilting", but it still gets confused with the word kwilt. Thus, everywhere you see the word kwilt, substitute it with the word quilted, or quilt (noun or verb)