Wat het verkeerd gegaan?

Hierdie is my trots - my heel eerste kwilt:

Met hierdie kwilt het ek geleer van kleurwaardes, 9-patch, 4-patch, beplanning, "binding" (wat ontaard het in 'n fiasko), en die vreugde van kwiltwerk. Selfs met al die mis-gestikte nate, en skewe blokkies, is ek trots op hierdie kwilt - wie sal nie trots wees op hul eerste voltooide projek nie?

Dus sal julle met my saamstem dat ek uiters teleurgesteld was toe ek gister hierdie raak sien:

So, waarna kyk ons? Elke prentjie het twee blokke/panele wat met mekaar vergelyk word. Die een is lieflik helder en kleurvol, die ander een...wel...verdof en groen!

Hier is die feite:
- Elkeen van hierdie stukke kom vanaf dieselfde rol materiaal as die een waarmee dit vergelyk word
- Elkeen het goud/metalic ingewerk
- Die goud/metalc is wat groen geraak het, of verdof het
- Die verkleuring het plaasgevind SLEGS aan die bokant/kop-kant van die kwilt (daar waar die arms bo-oor kom, of waar die kwilt tot onder die ken getrek word...die kop kant) en NIE die kant waar die son teen dit skyn nie.

Nou is my vraag - waarom? Wat het verkeerd gegaan? Is dit dat ons die goud/metalic afgevryf het terwyl ons slaap? Is die drukwerk van swak gehalte? Of it dit nou maar wat gebeur met metalic indien dit daagliks gebruik word? Ek wil selfs bietjie wetenskaplik hier raak - wat van oksidasie? Koper oksideer en raak groen - is dit dalk wat hier gebeur?

Ek was my kwilt in 30 Grade Celcius water, laat dit droog raak in die koelte, stoor dit in 'n plek so koel en droog soos Mauritius se humide weer dit sal toelaat, en vou dit gereeld oop. Is ek dalk besig om onbewustelik my kwilt te mishandel, en dis hoe hy my laat weet en mishandel hom?

Julle opinies sal waardeer word.

Op 'n beter noot - hier is 'n foto van 'n lieflike winter sonsondergang.

Groete vir eers!